Cofnodion

Cafwyd ymddiheuriadau gan y Llywydd. Cadeiriodd y Dirprwy Lywydd y cyfarfod yn ei habsenoldeb.

 

 

Nododd y Pwyllgor y cofnodion i’w cyhoeddi.

 

Dydd Mawrth, bydd Gweinidog yr Economi, Gwyddoniaeth a Thrafnidiaeth yn gwneud datganiad ar Tata Steel. 

 

Nododd y Rheolwyr Busnes y byddai pob pleidlais mewn perthynas â Bil yr Amgylchedd Hanesyddol (Cymru), ddydd Mawrth, a pob pleidlais mewn perthynas â'r Bil Lefelau Diogel Staff Nyrsio (Cymru), ddydd Mercher, yn digwydd yn ystod trafodion Cyfnod 3.

 

Nododd y Rheolwyr Busnes y bydd y pleidleisio ar bob eitem arall o fusnes ddydd Mawrth a dydd Mercher yn digwydd cyn i drafodion Cyfnod 3 ddechrau.

 

Nododd y Pwyllgor Busnes Amserlen Busnes y Llywodraeth ar gyfer y tair wythnos nesaf.

 

Penderfynodd y Pwyllgor Busnes ar drefn y busnes a chytunodd i amserlennu’r eitemau a ganlyn:

 

Dydd Mercher 2 Mawrth 2016 -

• Amser a neilltuwyd i'r Ceidwadwyr Cymreig (60 munud)
• Amser a neilltuwyd i Blaid Cymru (60 munud)
• Amser a neilltuwyd i Ddemocratiaid Rhyddfrydol Cymru (60 munud)

 

Dewisodd y Pwyllgor Busnes y ddau gynnig a gyflwynwyd ar gyfer y ddadl.

Dydd Mercher 10 Chwefror 2016

·         NNDM 5942

Julie Morgan (Gogledd Caerdydd)

Elin Jones (Ceredigion)

Darren Millar (Gorllewin Clwyd)

Aled Roberts (Gogledd Cymru)

Cynnig bod Cynulliad Cenedlaethol Cymru:

 

1. Yn gresynu at nifer y canghennau banc sydd wedi'u cau yng Nghymru ac, yn arbennig, pa mor aml y mae canghennau yn cael eu cau hyd yn oed pan mai'r gangen banc yw'r banc olaf yn yr ardal.

 

2. Yn galw ar fanciau i ystyried effaith cau canghennau banc ar gymunedau trefol a gwledig ac unigolion, yn enwedig pobl hŷn a busnesau bach, cyn i benderfyniadau terfynol gael eu gwneud ynghylch cau.

 

3. Yn galw ar fanciau i gynnal ymgynghoriad ystyrlon, gan gynnwys sefydliadau cymunedol lleol, sefydliadau pensiynwyr a grwpiau busnes cyn dod i benderfyniadau terfynol ynghylch cau canghennau, yn enwedig pan mai'r gangen banc dan sylw yw'r unig un sydd ar ôl yn yr ardal.

 

4. Yn galw ar Lywodraeth y DU, Llywodraeth Cymru a'r Awdurdod Ymddygiad Ariannol i sicrhau eu bod yn ystyried effaith cau canghennau banc wrth lunio eu polisïau perthnasol ar wasanaethau ariannol, datblygu economaidd a rheoleiddio ariannol.

 

Dydd Mercher 9 Mawrth 2016

·         NNDM4945

Eluned Parrott (Canol De Cymru)

Angela Burns (Gorllewin Caerfyrddin a De Sir Benfro)

Bethan Jenkins (Gorllewin De Cymru)

 

Cynnig bod Cynulliad Cenedlaethol Cymru:

 

1. Yn gresynu at y ffaith bod rhwng 300 a 350 o bobl yn marw o ganlyniad hunanladdiad bob blwyddyn yng Nghymru, gyda'r ffigurau diweddaraf yn dangos mai hunanladdiad yw'r prif achos o farwolaeth ymhlith pobl ifanc rhwng 20 a 34 oed.

 

2. Yn cydnabod bod pobl sydd wedi cael diagnosis o gyflwr iechyd meddwl mewn perygl arbennig ac amcangyfrifir bod gan 90 y cant o bobl sy'n ceisio cyflawni hunanladdiad neu'n marw o ganlyniad i hunanladdiad un neu fwy o gyflyrau iechyd meddwl.

 

3.  Yn credu bod angen gwneud mwy i annog pobl i siarad yn agored am hunanladdiad a theimladau hunanladdol, i godi ymwybyddiaeth a helpu i sicrhau nad oes neb yn cael eu gadael i deimlo eu bod yn dioddef ar eu pen eu hunain.

 

4. Yn galw ar Lywodraeth Cymru i:

 

a) gwella'r broses o gasglu data i adnabod y rhai sy'n wynebu'r perygl mwyaf;

 

b) sicrhau bod cymorth dilynol ar gael i bobl sy'n mynd i adrannau damweiniau ac achosion brys ar ôl hunan-niweidio neu geisio cyflawni hunanladdiad;

 

c) darparu ffyrdd mwy effeithiol o gyfeirio pobl at wasanaethau gwrando ac eiriolaeth;

 

d) edrych ar gyflawni prosiectau megis y parth tawelwch yn Lerpwl sy'n darparu cyngor blaengar mewn ffordd sy'n briodol i oedran ac sy'n apelio at bobl ifanc, ac enghreifftiau cenedlaethol a rhyngwladol eraill o arferion gorau; ac

 

e) asesu'r cymorth sydd ar gael i deuluoedd unigolion sydd â salwch meddwl.

 

O ganlyniad i'r rhaglen o ddiwygio Rheolau Sefydlog a gytunwyd gan y Pwyllgor Busnes ym mis Mai 2014, trafododd y Rheolwyr Busnes bapur yn nodi'r newidiadau amrywiol arfaethedig i Reolau Sefydlog 26, 18 a 30A.

Cytunodd y Rheolwyr Busnes i ymgynghori â'u grwpiau ac a thrafod y papur eto yn y cyfarfod ar 23 Chwefror 2016.