Cyfarfodydd

Datganodd William Powell y buddiant perthnasol a ganlyn o dan Reol Sefydlog 17.24A:

• Mae'n ymgyrchydd hirsefydlog yn erbyn ffracio.

Trafododd y Pwyllgor yr ohebiaeth ynghylch y ddeiseb a chytunwyd i gau’r ddeiseb. 

Trafododd y Pwyllgor yr ohebiaeth ynghylch y ddeiseb a chytunodd i aros am sylwadau'r deisebydd ar ohebiaeth y Gweinidog.

Ystyriodd y Pwyllgor ohebiaeth ar y ddeiseb, a chytunodd i ysgrifennu at y Gweinidog Cyfoeth Naturiol i gael eglurhad ar swm a sylwedd sylwadau a nodwyd yn ddiweddar, yn ôl y sôn, am foratoriwm ar ffracio, nad oes sôn amdanynt yn ei lythyr at y Pwyllgor.

Trafododd y Pwyllgor yr ohebiaeth ynghylch y ddeiseb a chytunodd i:

·         Ysgrifennu at y Gweinidog Cyfoeth Naturiol newydd yn gofyn am ei ymateb i ddogfen y deisebydd a’i farn ar y ‘ddeiseb’ gysylltiedig a gyflwynwyd i’r Prif Weinidog sydd yn ôl y sôn wedi casglu 90,000 o lofnodion; ac

·         Anfon y wybodaeth a gyflwynwyd gan Gyfeillion y Ddaear Cymru i Gyfoeth Naturiol Cymru (NRW), gan dynnu eu sylw’n arbennig at y sylwadau ar dudalen 2 am y diffyg arweiniad a ddarperir gan NRW.

Trafododd y Pwyllgor yr ohebiaeth gan y deisebydd, a oedd yn cynnwys llythyr ato gan y Prif Weinidog, a chytunodd i ysgrifennu at:

1.   y Gweinidog Cyfoeth Naturiol a Bwyd yn gofyn ei farn am sylwadau'r deisebydd ac yn benodol y ceisiadau gan randdeiliaid am ganllawiau ychwanegol;

2.   y Prif Weinidog, yn gofyn am ragor o fanylion ynghylch ei farn ymddangosiadol bod y strwythurau rheoleiddio presennol yn briodol, yn enwedig o ystyried barn rhanddeiliaid, sy'n awgrymu i'r gwrthwyneb;

3.   y deisebydd, yn gofyn am ragor o wybodaeth am y llefarydd diwydiant a soniwyd amdano yn yr ohebiaeth; a

4.   Cyfoeth Naturiol Cymru, yn gofyn ei farn.

Trafododd y Pwyllgor yr ohebiaeth ar y ddeiseb a chytunodd i ysgrifennu eto at y deisebwyr i ofyn iddynt a oes ganddynt unrhyw sylwadau i'w gwneud am yr ymatebion a ddaeth i law.

Oherwydd bod amser yn brin, gohiriwyd yr eitem hon i'w thrafod ar 10 Rhagfyr 2013.

Ystyriodd y Pwyllgor yr ohebiaeth ynghylch y ddeiseb a chutunodd i;

·         ysgrifennu at y Gweinidog Cyfoeth Naturiol a Bwyd i holi faint o swyddogion sy’n ‘arbenigwyr’ ar ffracio a lefel yr arbenigedd sydd ar gael i Lywodraeth Cymru;

·         ysgrifennu at y Pwyllgor Amgylchedd a chynaliadwyedd yn holi am y wybodaeth ddiweddaraf ynghylch y sesiwn dystiolaeth ddiweddar ar nwy anghonfensiynol; ac

·         ysgrifennu at y Pwyllgor Dethol Materion Cymreig yn tynnu sylw at ystyriaethau’r Pwyllgor o’r materion hyn.

Ystyriodd y Pwyllgor ohebiaeth ynghylch y ddeiseb a chytunodd i ysgrifennu at:

·         y Pwyllgor Amgylchedd a Chynaliadwyedd gan rannu'r ohebiaeth gan y Gweinidog Tai ac Adfywio, a nodi nad yw Llywodraeth Cymru ar hyn o bryd yn bwriadu cyflwyno canllawiau ychwanegol, er gwaethaf cais y deisebwyr a Chymdeithas Llywodraeth Leol Cymru; ac at

·         y Gweinidog Tai ac Adfywio yn holi a yw'r Llywodraeth wedi comisiynu unrhyw waith ymchwil ynghylch ffracio neu a yw wedi ceisio cyngor annibynnol ynghylch hynny.

Ystyriodd y Pwyllgor yr ohebiaeth ar y ddeiseb a chytunodd i ysgrifennu at:

·         y Gweinidog Tai ac Adfywio yn amlygu pryderon Cymdeithas Llywodraeth Leol Cymru am y diffyg canllawiau o ran ffracio; a’r

·         Pwyllgor Amgylchedd a Chynaliadwyedd yn gofyn i gael gwybod y wybodaeth ddiweddaraf wrth iddo ystyried y mater.

Daeth gohebiaeth i law’r Pwyllgor mewn cysylltiad â’r ddeiseb a chytunodd y Pwyllgor i:

Ysgrifennu at Gymdeithas Llywodraeth Leol Cymru i ofyn a yw awdurdodau cynllunio lleol yn teimlo bod y canllaw cynllunio presennol yn ddigon clir ar fater ffracio;

Rhannu ymateb y deisebwyr â’r Gweinidog;

Ysgrifennu at y Pwyllgor Amgylchedd a Chynaliadwyedd i ofyn a yw’n bwriadu cynnal unrhyw waith pellach mewn cysylltiad â ffracio, yn dilyn ei ymchwiliad i gynllunio a pholisi ynni.

Ystyriodd y Pwyllgor y ddeiseb hon am y tro cyntaf a chytunodd i ysgrifennu at Weinidog yr Amgylchedd a Datblygu Cynaliadwy i ofyn am ei farn ar bwnc y ddeiseb.