Cyfarfodydd

Trafododd y Comisiynwyr gais gan y Pwyllgor Cyfrifon Cyhoeddus am wybodaeth bellach mewn perthynas â'r ymateb i ddau o'r argymhellion a wnaed gan y Pwyllgor.  Nododd y Comisiynwyr y llythyr gan y Pwyllgor a chytunodd ar ymateb.

Rhoddwyd y wybodaeth ddiweddaraf i’r Comisiynwyr am waith craffu arferol y Pwyllgor Cyfrifon Cyhoeddus ar Gyfrifon 2018-19. Roedd yr adroddiad yn cynnwys chwe argymhelliad.

Cytunodd y Comisiynwyr ar eu hymateb i adroddiad y Pwyllgor Cyfrifon Cyhoeddus.

Diweddarwyd y Comisiynwyr ar wahanol agweddau ar gyllideb y Comisiwn ar gyfer y flwyddyn gyfredol.

Trafododd y Comisiynwyr danwariant a ragwelir mewn perthynas â defnyddio cyllideb y Penderfyniad a'r amcangyfrif o gostau Cyllid Pensiwn yr Aelodau, a gafwyd gan Adran Actiwari'r Llywodraeth, sy'n is na'r gyllideb a osodwyd cyn dechrau'r flwyddyn ariannol.

Cytunodd y Comisiynwyr i gyflwyno Cyllideb Atodol, i'w chynnwys yng nghynnig cyllideb Llywodraeth Cymru, i wneud gostyngiad o £500,000 yng nghyllideb y gwariant a reolir yn flynyddol a gostyngiad o £500,000 yn llinell Penderfyniad y Bwrdd Taliadau yn y gyllideb (cyflogau Aelodau a chostau cysylltiedig).

Cytunodd y Comisiwn i gynnig Cynllun Ymadael Gwirfoddol, y rhagwelir y bydd yn hwyr ym mis Tachwedd 2018 i sicrhau y gall barhau i ddarparu'r sgiliau, yr arbenigedd a'r capasiti angenrheidiol i gefnogi'r Cynulliad drwy'r heriau penodol yn sgil Brexit a Newid Cyfansoddiadol. Tynnwyd sylw'r Pwyllgor Cyfrifon Cyhoeddus a'r Pwyllgor Cyllid at y posibilrwydd o Gynllun Ymadael Gwirfoddol yn ystod y cylch cyllideb diweddar a'r gwaith o graffu ar y cyfrifon.

Cytunodd y Comisiynwyr y dylai'r Prif Weithredwr a'r Swyddog Cyfrifyddu ysgrifennu at y Pwyllgor Cyfrifon Cyhoeddus a'r Pwyllgor Cyllid i roi gwybod iddynt am y penderfyniadau hyn.

Cyflwynodd Catharine Bray adroddiad rheoli ariannol diwygiedig ar gyfer y flwyddyn hyd at 31 Ionawr gan ystyried penderfyniadau gwario y Bwrdd Buddsoddi ac Adnoddau (IRB). Roedd arian wrth gefn ar gyfer costau, fel absenoldeb mamolaeth, wedi'i neilltuo i gael ei dalu'n ganolog. Cafodd y Bwrdd wybod er bod dyraniadau ar gyfer y flwyddyn ariannol newydd yn cael eu cwblhau, mae'n bosibl y bydd angen gofyn am fwy o arbedion ar gyllidebau yn ystod y flwyddyn.

Amlinellodd Dave Tosh y broses blaenoriaethu MoSCoW yr oedd yr IRB yn eu defnyddio i helpu i nodi blaenoriaeth prosiect yn seiliedig ar sgorau yn erbyn cyfres o feini prawf, i helpu i benderfynu ar y rhaglen fuddsoddi ar gyfer y flwyddyn i ddod. Roedd yn helpu i wneud penderfyniadau ac yn rhoi ffurfioldeb i'r broses. Byddai angen mwy o drafodaeth ar yr eitemau y gellir eu gwneud a byddai'n dibynnu ar yr arian sydd ar gael.

CAM I’W GYMRYD: Dave Tosh i ddosbarthu proses MoSCoW i aelodau'r Bwrdd.

Wedi rhoi gwybodaeth i’r Pwyllgor Cyllid eisoes, trafododd y Comisiynwyr weddill yr argymhellion a wnaed gan y Pwyllgor yn ei adroddiad ar Gyllideb Ddrafft y Comisiwn ar gyfer 2018-19, yn ymwneud ag adeiladau a’r Adolygiad Capasiti.

Cytunodd y Comisiynwyr ar eu hymateb i adroddiad y Pwyllgor Cyllid.

Rhoddodd Manon Antoniazzi amlinelliad i'r Bwrdd o'r heriau a oedd yn codi yn sgil yr argymhellion, yn dilyn sesiwn graffu'r Pwyllgor ar Gyllideb ddrafft y Comisiwn ar gyfer 2018-19. Nid oedd cylch gorchwyl mor glir i'r Pwyllgor fabwysiadu'r gyllideb eleni fel yn y blynyddoedd blaenorol, a cheisiwyd eglurhad pellach mewn perthynas â'r cyfnod a gwmpesir gan yr argymhelliad cyntaf.

Trafododd y Bwrdd yr ymateb i bob argymhelliad, a fyddai'n cael eu cyflwyno i'r Comisiynwyr yn eu cyfarfod ar 6 Tachwedd i'w cymeradwyo, gan gynnig y dylid cytuno ar yr argymhellion gan mwyaf, ond hefyd wneud achos am yr adnoddau a'r hyblygrwydd sydd eu hangen i gyflawni strategaeth y Comisiwn.

CAM I’W GYMRYD: Nia Morgan i ddosbarthu'r ymateb drafft i'r Bwrdd i gael sylwadau cyn ei gwblhau.

Papur 1 – adroddiad drafft

6.1 Cytunodd y Pwyllgor ar yr adroddiad â rhai mân newidiadau.

Ar ôl trafodaeth gychwynnol ar y gyllideb ddrafft yn y cyfarfod diwethaf, trafododd y Comisiynwyr waith pellach a oedd wedi'i wneud yn cynnwys gwybodaeth newydd a ddaeth i law mewn perthynas â Chynllun Pensiwn Aelodau'r Cynulliad a Chost Gwasanaeth Pensiwn (cyllideb AME).

Bu'r Comisiynwyr yn myfyrio ar y sefyllfa o ran eu strategaeth a gwaith y Cynulliad flwyddyn ar ôl yr etholiad, a'r cyfeiriad y maent yn dymuno ei ddarparu o ran blaenoriaethu. Roeddent yn cytuno y dylent fod yn rhan o waith pellach ar hyn yn ystod y toriad.

Caiff y gyllideb ddrafft ei gosod ar ôl ystyriaeth derfynol y Comisiwn ym mis Medi.

Eitem lafar

Darparwyd y wybodaeth ddiweddaraf am strategaeth y gyllideb o gyfarfod y Comisiwn ar 12 Mehefin.  Oherwydd y pwysau ariannol sylweddol ar y gyllideb a datblygiadau annisgwyl, gwnaeth swyddogion, ynghyd â'r Llywydd a Suzy Davies AC yn ei rôl fel prif Gomisiynydd ar strategaeth y gyllideb, ystyried cynigion i reoli costau prosiectau, gan ystyried ymarferoldeb a risgiau, a sicrhau gwell eglurder mewn perthynas â chapasiti a chyfeiriad.

Darparodd y Bwrdd fewnbwn ar y pwysau yn ystod y flwyddyn, sut y gellid rheoli hynny a'r effaith ar y strategaeth ar gyfer ariannu yn y dyfodol.

Trafododd y Comisiynwyr baratoadau’r gyllideb ar gyfer y flwyddyn ariannol 2018-19.

Trafododd y Comisiynwyr y cyd-destun presennol, sydd wedi gweld lefel y newid yn mynd yn fwy na’r disgwyl, gyda chynnydd yn y pwysau a’r galw ar Gomisiwn y Cynulliad. Cydnabuont fod newidiadau pellach ar y gorwel a bod angen dal y ddysgl yn wastad rhwng cefnogi’r rhain a pharhau i ddarparu gwasanaethau rhagorol i’r Aelodau ac i bobl Cymru.

Cadarnhaodd y Comisiynwyr eu cefnogaeth am gyfeiriad y gwaith a gwnaed cais am wybodaeth ychwanegol i gefnogi eu penderfyniadau yn y dyfodol.

Cytunodd y Comisiynwyr y caiff y gyllideb ddrafft derfynol ei gosod erbyn diwedd mis Medi yn dilyn ystyriaeth bellach.

Crynhodd Manon Antoniazzi bwyntiau allweddol y strategaeth i roi cyd-destun ac i lywio trafodaethau'r Bwrdd ar gynllunio a risg.

Roedd y sefyllfa ariannol bresennol yn arbennig o heriol heb fawr o hyblygrwydd, a oedd yn golygu bod angen i gyllideb 2018-19 fod yn ddigonol i gynnal cyflymder y newid a dyheadau'r Pumed Cynulliad, llwyth gwaith cynyddol i Aelodau a chynnydd o ran sicrhau mwy o bwerau i Gymru, tra'n bod yn ddarbodus ac yn ystyriol o gyd-destun y sector cyhoeddus ehangach.

Roedd gwaith yn mynd rhagddo i edrych ar feysydd hyblygrwydd a allai gyflwyno arbedion yn y gyllideb, ond roedd angen bod yn realistig o ran digonolrwydd ac roedd meysydd o hyd lle nad oedd costau wedi'u diffinio, neu y gellir eu dwyn ymlaen i'r flwyddyn ariannol ganlynol.

Gofynnwyd i'r Bwrdd drafod a oedd y gyllideb arfaethedig yn ddigonol i gyflawni'r blaenoriaethau, a thrafodwyd y tybiaethau yr oedd y gyllideb yn seiliedig arnynt, p'un a oes effeithlonrwydd pellach y gellir eu nodi o fewn gwasanaethau neu o waith prosiect i ryddhau cyllid neu adnoddu staff ychwanegol.

CAMAU I’W CYMRYD:

·                Nia Morgan a Lowri Williams i ystyried y costau sy'n ymwneud â staffio.

·                Penaethiaid Gwasanaethau i edrych i weld p'un a ellir ailystyried gwariant dewisol.

·                Egluro'r geiriad strategaeth ar gostau ar gyfer y Senedd Ieuenctid; cryfhau'r naratif ar FySenedd; cynnwys enghreifftiau o arbedion o ddydd i ddydd sy'n cael eu gwneud e.e. Cofnod y Trafodion/y Swyddfa Gyflwyno.

Byddai Strategaeth y Gyllideb yn cael ei chyflwyno i gyfarfod y Comisiwn ar 12 Mehefin.