Cyfarfodydd

Trafododd y Pwyllgor Busnes bapur ar amserlenni cyflym ar gyfer Biliau'r Senedd. Nododd y Pwyllgor brofiad y ddau Fil a amlinellwyd yn y papur a gofynnodd i swyddogion ddrafftio offeryn gwneud penderfyniadau y gellid ei ddefnyddio i'w gynorthwyo i wneud penderfyniadau yn y dyfodol ar amserlenni Biliau pan fydd amserlen gyflym wedi’i chynnig.

Gofynnodd Darren Millar i ystyried faint o amser sydd ar gael i'r Aelodau i baratoi ar gyfer trafodion Cyfnod 2 a Chyfnod 3 ar Filiau yn dilyn y terfyn amser ar gyfer cyflwyno gwelliannau. Gofynnodd y Pwyllgor Busnes i swyddogion ddarparu nodyn am y materion hyn, i gynnwys profiad diweddar yn ymwneud â’r Bil Seilwaith (Cymru).

Dychwelodd y Pwyllgor Busnes at ystyried a ddylai fwrw ymlaen â thrafod Rhannu Swydd Cadeirydd Pwyllgor cyn toriad y Pasg, a swyddi gwag posibl cadeiryddion pwyllgorau a allai godi yn sgil y Prif Weinidog newydd yn penodi ei lywodraeth. Cytunodd mwyafrif ar y Pwyllgor Busnes bod angen cyfnod hwy o amser i roi ystyriaeth lawn i'r materion perthnasol.

Cytunodd y Pwyllgor Busnes i fwrw ymlaen â'r drafodaeth fanwl honno dros y misoedd nesaf, gan gydnabod na fyddai unrhyw newidiadau ar waith erbyn i unrhyw swydd wag godi yn dilyn toriad y Pasg.

Trafododd y Pwyllgor Busnes bapur ar Rannu Swydd Cadeirydd Pwyllgor a chytunodd i gynnal trafodaeth bellach yn y cyfarfod nesaf, yn dilyn trafodaethau gyda grwpiau pleidiau.

·       Ymateb gan y Pwyllgor Iechyd a Gwasanaethau Cymdeithasol

·       Ymateb gan y Pwyllgor Deddfwriaeth, Cyfiawnder a’r Cyfansoddiad

·       Ymateb gan Fforwm y Cadeiryddion

·       Gohebiaeth gan y Cwnsler Cyffredinol a Gweinidog y Cyfansoddiad

·       Papur ar y gweithdrefnau sy'n ofynnol er mwyn craffu ar ddeddfwriaeth sy'n ymwneud â Deddf Marchnad Fewnol y Deyrnas Unedig 2020 a fframweithiau polisi cyffredin y DU gyfan”

Trafododd y Pwyllgor Busnes ymatebion a gafwyd gan y Pwyllgor Iechyd a Gofal Cymdeithasol, y Pwyllgor Deddfwriaeth, Cyfiawnder a'r Cyfansoddiad, Fforwm y Cadeiryddion a'r Cwnsler Cyffredinol a Gweinidog y Cyfansoddiad i gynigion i ddiwygio'r Rheolau Sefydlog.

Cytunodd y Pwyllgor Busnes i rannu'r ymatebion a dderbyniwyd ac i roi cyfle i'r rhai sydd eisoes wedi darparu gwybodaeth i ddarparu rhagor o fyfyrdodau, cyn dychwelyd at y mater o wneud newidiadau i'r Rheolau Sefydlog mewn cyfarfod yn y dyfodol. 

Nododd y Pwyllgor Busnes ddiweddariad ar amserlennu arfaethedig ei raglen waith gweithdrefnol, a chytunodd arno.

Trafododd y Pwyllgor Busnes bapur ar barodrwydd gweithdrefnol ar gyfer diwygio'r Senedd a chytunodd mewn egwyddor i ddechrau ystyried meysydd o ddiwygio gweithdrefnol yn ystod hydref 2024.

Cytunodd y Pwyllgor Busnes hefyd i archwilio'r posibilrwydd o gynnal sesiynau gweithdy gydag Aelodau sydd â diddordeb yn ystod Gwanwyn 2024, er mwyn llywio datblygiad y gwaith hwn.

Yn dilyn argymhellion a wnaed yn flaenorol gan y Pwyllgor Deddfwriaeth, Cyfiawnder a'r Cyfansoddiad a'r Pwyllgor Iechyd a Gofal Cymdeithasol, trafododd y Pwyllgor Busnes gynigion ar gyfer:

• diwygio'r Rheolau Sefydlog i sicrhau bod dogfennau sy'n cyd-fynd â Biliau ac Is-ddeddfwriaeth Llywodraeth Cymru yn cynnwys asesiad o effaith Deddf Marchnad Fewnol y Deyrnas Unedig 2020;
• Rheol Sefydlog newydd a fyddai’n ei gwneud yn ofynnol i Lywodraeth Cymru hysbysu’r Senedd am effaith deddfwriaeth mewn rhannau eraill o'r DU a allai, yn rhinwedd y Ddeddf Marchnad Fewnol, effeithio ar werthu nwyddau a gwasanaethau yng Nghymru; a
• hysbysu am effaith fframweithiau polisi cyffredin y DU gyfan ar ddeddfwriaeth y Senedd.

Dywedodd y Trefnydd nad yw Llywodraeth Cymru yn ystyried bod y cynigion yn angenrheidiol ar y sail nad yw'n ystyried bod Deddf Marchnad Fewnol y Deyrnas Unedig yn cael effaith ar ddeddfwriaeth a basiwyd gan y Senedd.

Cytunodd y Pwyllgor Busnes i ofyn am farn y Pwyllgor Deddfwriaeth, Cyfiawnder a'r Cyfansoddiad a'r Pwyllgor Iechyd a Gofal Cymdeithasol a Fforwm y Cadeiryddion am y cynigion, gyda’r bwriad o ddychwelyd at y mater mewn cyfarfod yn y dyfodol.

Nododd y Pwyllgor Busnes bapur ar gyflwyno terfynau amser ar atebion gweinidogol yn Senedd yr Alban a chytunodd i ddychwelyd at drafodaeth bellach ar y pwnc hwn unwaith y bydd rhagor o wybodaeth ar gael am effaith y newid yn yr Alban.

Trafododd y Pwyllgor Busnes y newidiadau arfaethedig i'r canllawiau ar Gwestiynau Amserol, yn ymwneud â'r broses gyhoeddi, darparu gwybodaeth ategol gan Aelodau a'r nifer uchaf o Gwestiynau Amserol a fydd fel arfer yn cael eu derbyn ym mhob sesiwn, a chytunodd arnynt.

Trafododd y Pwyllgor Busnes y papur a chytunodd i ymgynghori â'r Pwyllgor Deddfwriaeth, Cyfiawnder a'r Cyfansoddiad ar y dull arfaethedig o ddiwygio Rheolau Sefydlog 21, 27 a 30C, a dileu Rheol Sefydlog 30B, gyda'r bwriad o gynnig newidiadau i'r Senedd wedi hynny. 

Trafododd y Pwyllgor Busnes adborth a gafwyd gan grwpiau a nifer o faterion eraill yn ymwneud â'r canllawiau a'r gweithdrefnau presennol ar gyfer Cwestiynau Amserol.

Cytunodd y Pwyllgor y byddai'n ystyried cynigion ar gyfer diwygiadau posibl i ganllawiau mewn cyfarfod yn y dyfodol.

Nododd y Pwyllgor Busnes ddiweddariad ar amserlennu arfaethedig ei waith gweithdrefnol.

Cynigiodd Darren Millar y dylid ystyried gosod terfyn amser ar ymatebion gweinidogol i gwestiynau.

Cytunodd y Pwyllgor Busnes i adolygu'r Rheolau Sefydlog perthnasol a nodwyd yn argymhellion diweddar y Pwyllgor Deddfwriaeth, Cyfiawnder a'r Cyfansoddiad mewn perthynas ag effaith ymarferol Deddf Marchnad Fewnol y DU 2020 ar ddeddfwriaeth a wnaed gan y Senedd, neu sy’n effeithio arni.

Fel rhan o'r adolygiad, nododd y Pwyllgor Busnes y bydd cynigion yn cael eu cynhyrchu mewn perthynas â'r ffyrdd posibl y gellid diwygio Rheolau Sefydlog, a chytunwyd y byddai'n ymgynghori â'r Pwyllgor Deddfwriaeth, Cyfiawnder a'r Cyfansoddiad.

Cytunodd y Pwyllgor Busnes hefyd i ystyried cynigion i newid y trefniadau craffu cyfredol ar gyfer Fframweithiau Polisi Cyffredin fel yr argymhellwyd gan Bwyllgor Materion Allanol a Deddfwriaeth Ychwanegol y Bumed Senedd, mewn ymgynghoriad â Fforwm y Cadeiryddion.

Trafododd y Pwyllgor Busnes raglen ddiwygiedig ar gyfer ei waith gweithrefnol, a chytunodd arni, gan gynnwys trafod ymhellach yr eitemau a ganlyn cyn cyn toriad yr haf:

• Cyflwyno ‘uwch-ddadleuon’ yn y Cyfarfod Llawn
• Diwygiadau gweithdrefnol ar ôl Brexit
• Biliau Aelodau
• Materion sy'n codi o ganlyniad i Fil Cyfraith yr UE a Ddargedwir (Dirymu a Diwygio)

Cytunodd y Pwyllgor i roi ystyriaeth bellach i waith gweithdrefnol a all fod yn ofynnol o ganlyniad i ddiwygio'r Senedd pan fydd deddfwriaeth wedi'i chyflwyno.