Cyfarfodydd

Cafodd y Comisiynwyr ddiweddariad ar gynnydd cyfnod caffael prosiect Bae 32, a nodwyd y câi Achos Busnes Amlinellol (OBC) ei gyflwyno i'r cyfarfod ar 18 Rhagfyr, ar gyfer ei gadarnhau. Byddai'r Achos Busnes Amlinellol yn amlinellu'r ateb a ffefrir. Byddai Cytundeb Cyn-Ddatblygu, i'w lofnodi gyda chyflenwr yr ateb a ffefrir, yn cael ei gyflwyno ochr yn ochr â'r Achos Busnes Amlinellol, i'w ystyried a'i gymeradwyo.

Nododd y Comisiynwyr y gwaith sy'n cael ei wneud i gyflawni gwelliannau i hwyluso mynediad ar leoliad at wasanaethau'r Comisiwn i Aelodau ar gyfer y Seithfed Senedd, drwy ddarparu gofod penodedig.

Cafodd y Comisiynwyr y wybodaeth ddiweddaraf am y tri phrosiect Ffyrdd o Weithio mawr, sef: Bae Caerdydd 32, Siambr 2026 a Tŷ Hywel 2026.

Rhoddodd y Comisiynwyr gymeradwyaeth mewn egwyddor (yn amodol ar ystyried papur manwl yn ddiweddarach yn y flwyddyn) i'r cynllun i ymrwymo i Gytundeb Cyn-datblygu gyda chyflenwr y datrysiad a ffefrir ar gyfer y llety yn y dyfodol fel rhan o brosiect Bae 32.

Fe wnaethant ystyried ymhellach y catalog gofynion Bae 32 wedi'i ddiweddaru, a'r newidiadau a wnaed ers ystyried y catalog ddiwethaf, a'r rhesymeg dros y mireinio hwn. Bydd y gofynion yn cael eu darparu i'r tendrwyr ym mhroses deialog gystadleuol Bae 32, i lywio cyflwyniad eu cynigion terfynol ym mis Hydref.

Cymeradwyodd y Comisiynwyr y catalog gofynion wedi'i ddiweddaru ar gyfer proses gaffael Bae 32, gan gynnwys y diwygiadau a nodir, i'w ddarparu i’r tendrwyr cyn eu cyflwyniadau terfynol.

Adolygodd y Comisiynwyr yr opsiynau a gynigwyd ar gyfer y paneli acwstig a'r seddi yn Siambr y Senedd sydd newydd ei hadnewyddu, a chadarnhawyd y dewis a ffefrir i brynu 110 o gadeiriau tasgau Humanscale Freedom ar gyfer seddi'r Aelodau.

Byddai angen profion ychwanegol brys ar y paneli acwstig a byddai'r opsiwn terfynol arfaethedig yn cael ei gyflwyno i'r Comisiynwyr y tu allan i'r cyfarfod.

Cafodd y Comisiwn y wybodaeth ddiweddaraf am gynnydd prosiect Bae 32, a'r camau sy'n arwain at y Comisiwn yn cymeradwyo’r cynigydd llwyddiannus ym mis Rhagfyr.

Fel rhan o’r gwaith o ehangu Siambr y Senedd, bydd rhaid symud y gwaith celf a elwir yn ‘Calon Cymru’ er mwyn galluogi’r gwaith strwythur a sylfaen sydd ei angen er mwyn ehangu’r Siambr i gynnwys 96 o Aelodau. Nodwyd y byddai angen ymgynghori â'r artist a gynhyrchodd y darn yn dilyn unrhyw benderfyniad.

Adolygodd y Comisiynwyr yr opsiynau a ystyriwyd ar gyfer Calon Cymru a:

·         chymeradwywyd opsiwn 1, sef tynnu’r gwaith celf yn ei gyfanrwydd ac unioni’r lloriau; a

·         gosod y gwaith celf yn ofalus mewn storfa (oni bai ei fod wedi’i ddifrodi yn ystod y broses symud) a thrafod y camau nesaf ymhellach ar ôl asesu ei gyflwr.

Nododd y Comisiynwyr bolisi staff newydd y Comisiwn ar weithio hybrid, yn ogystal â'r cyd-destun sy'n golygu bod angen cyflwyno'r polisi hwn. Caiff y polisi ei gyhoeddi ar fewnrwyd y staff.

Cafodd y Comisiynwyr y wybodaeth ddiweddaraf am gynnydd y broses cyn-gymhwyso’r contract ar gyfer prosiect Bae 32, a’r amserlen ddangosol ar gyfer y broses o ran deialog gystadleuol.

Nododd Hefin David fod y Pwyllgor Cyllid yn cynnal sesiynau craffu cyhoeddus a phreifat ar brosiect Bae 32 ar 27 Mawrth.

Trafododd y Comisiynwyr yr amserlen ar gyfer y prosiect, ac fe’u hatgoffwyd, pe bai adeilad newydd yn opsiwn a ffefrir, byddai angen ei gwblhau erbyn 2030 ar gyfer ei feddiannu yn 2032. Nodwyd hefyd fod yr amserlen bresennol yn rhagweld y byddai’r Comisiwn yn gwneud penderfyniad ar yr ateb a ffefrir erbyn diwedd y flwyddyn galendr 2025; nid oedd modd hyd yma i lunio’r amserlen ar gyfer y camau nesaf yn dilyn y penderfyniad hwnnw, yn arwain at ddyfarnu’r contract, gan y byddai’n dibynnu ar natur a chyd-destun y penderfyniad o ran yr ateb a ffefrir, nad oedd modd ei ragweld eto.

Nododd y Comisiynwyr gynnydd y prosiect.

Trafododd y Comisiynwyr brosiect llety Bae 2032 mewn dwy ran, sef yr achos busnes amlinellol a’r broses gaffael. Roedd Saurabh Das o Avison Young yn bresennol yn y cyfarfod i gyflwyno’r achos busnes amlinellol.

Achos busnes amlinellol

Cafodd y Comisiynwyr sicrwydd fod proses Llyfr Gwyrdd y Trysorlys / Llywodraeth Cymru yn cael ei dilyn wrth ddatblygu prosiect Bae 2032 i sicrhau llywodraethu cadarn.

Cyflwynwyd tri opsiwn fel rhan o'r achos busnes amlinellol – A. Ôl-ffitio Tŷ Hywel, B. Cyfleuster newydd ar un safle, a C. Cyfleuster a adeiledir o’r newydd yn rhannol ond sydd hefyd yn defnyddio adeilad sydd eisoes yn bodoli.

Ystyriwyd bod yr opsiynau hyn yn debygol o fodloni’r dyheadau a’r gofynion o ran gofod a nodwyd yn yr achos strategol amlinellol a gymeradwywyd gan y Comisiwn ym mis Ionawr 2024 ac a oedd wedi’i ddiweddaru a’i brofi drwy’r broses o lunio’r achos busnes amlinellol. Ni nodwyd unrhyw opsiwn a ffefrir yn yr achos busnes amlinellol oherwydd natur gymhleth y prosiect a'r angen am broses gystadleuol gref.

Nododd y Comisiynwyr y cyngor a gafwyd gan CBRE ac Avison Young,  partneriaid yn y prosiect, fod yr amserlenni ar gyfer ymgysylltu â’r farchnad yn dynn iawn, ac y dylid ystyried diwedd Ionawr 2025 fel y dyddiad olaf un i gadw at amserlenni’r prosiect a nodwyd yn yr achos busnes amlinellol. 

Cymeradwyodd y Comisiwn yr achos busnes amlinellol.

Caffael

Cytunodd y Comisiynwyr i oedi’r penderfyniad i symud i’r cam caffael. Ni fyddai’r penderfyniad hwn yn cael ei wneud nes bod rhagor o waith ymgysylltu wedi’i wneud â rhanddeiliaid allweddol.

Nododd y Comisiynwyr y byddai’r Llywydd yn ymgynghori ag arweinwyr y grwpiau gwleidyddol ac y byddai trafodaethau ychwanegol gan y Comisiwn yn cael eu trefnu yn ôl yr angen.

Nododd y Comisiynwyr y cyngor cyfreithiol a gafodd swyddogion y Comisiwn mewn perthynas â'r Hysbysiad Contract.

Trafododd y Comisiynwyr y cynlluniau terfynol ar gyfer ehangu Siambr y Senedd wrth baratoi i letya 96 o Aelodau yn dilyn Etholiadau 2026. Cawsant y wybodaeth ddiweddaraf am y gwaith dylunio manwl a wnaed gan Rogers Stirk Harbour & Partners hyd yma fel rhan o brosiect Siambr 26. Nodwyd bod gwaith ymgysylltu helaeth wedi’i wneud â’r Aelodau, a hynny ar sail unigol ac ar y cyd.

Cytunodd y Comisiynwyr y byddai cynigion ar gyfer disodli Calon Cymru yn cael eu datblygu a’u rhannu â’r Comisiynwyr a’r Aelodau eraill maes o law.

Nododd y Comisiynwyr hefyd y bydd rhagor o fanylion am ddyluniad arfaethedig y wal gefn acwstig newydd yn cael eu cyflwyno i'r Comisiwn yn y flwyddyn newydd. Rhoddodd y Comisiynwyr eu caniatâd i’r prosiect symud ymlaen i'r cam tendro ar gyfer y gwaith adeiladu.

Cafodd y Comisiynwyr grynodeb o’r gwaith diweddar ar brosiect Tŷ Hywel 26 a thrafodwyd opsiynau terfynol ar gyfer creu’r 36 o swyddfeydd Aelodau newydd yn adeilad Tŷ Hywel, er mwyn galluogi caffael ar gyfer y prosiect a dechrau’r gwaith yn y flwyddyn ariannol bresennol.

Nododd y Comisiynwyr y gwaith a'r ymgysylltu a wnaed hyd yma. Codwyd nifer o bwyntiau ganddynt i gefnogi bod y ddarpariaeth yn ddigon hyblyg i ddarparu ar gyfer anghenion fel hygyrchedd corfforol, i gefnogi niwroamrywiaeth, ac i ddarparu amrywiaeth o gynigion i ddiwallu anghenion Aelodau'r dyfodol. Cytunwyd ar yr opsiynau a argymhellir ar gyfer creu

• swyddfeydd Aelodau ychwanegol mewn model 'cynllun agored' ar lawr 3A (opsiwn 1); a

'swyddfeydd sengl safonol' ar 2A yn Nhŷ Hywel (opsiwn 3).

Cafodd y Comisiwn y wybodaeth ddiweddaraf am y gwaith a wnaed hyd yma yn dilyn penodi’r cyflenwr gwasanaethau pensaernïol, Rogers Stirk Harbour Partnership (RSHP), i weithio gyda Chomisiwn y Senedd ar brosiect Siambr 2026. 

Roedd hyn yn cynnwys y cynllun i ehangu’r Siambr ar gyfer 96 o Aelodau a chamau nesaf y prosiect, opsiynau TGCh ar gyfer y Siambr ac ystyriaethau diogelwch.

Nododd y Comisiynwyr y gwaith a wnaed hyd yma ar y cynllun i ehangu’r Siambr i gynnwys 96 o Aelodau a chamau nesaf y prosiect.

Cytunwyd i ymgysylltu’n ehangach ag aelodau o’u grwpiau mewn perthynas â’r gwydr yn yr oriel gyhoeddus, gan nodi cynnwys y papur mewn perthynas â’r materion diogelwch cysylltiedig.

Gwnaethant gymeradwyo’r tybiaethau o ran TGCh a nodwyd yn y papur ac i ddewis y Grŵp Cyfeirio o blaid Opsiynau 2 a 3 gael ei lunio'n fanylach cyn gwneud penderfyniadau yn y dyfodol, gan ddiystyru Opsiynau 1 a 4 ar gyfer gwaith pellach.

Cytunodd y Comisiynwyr i Siambr Hywel gael ei defnyddio fel Siambr dros dro ar gyfer y Cyfarfod Llawn tra bo gwaith i addasu Siambr y Senedd yn mynd rhagddo, gan beidio â defnyddio Siambr Hywel ar gyfer unrhyw weithgareddau heblaw’r Cyfarfod Llawn yn ystod y cyfnod dan sylw.

Cafodd y Comisiynwyr grynodeb o’r gwaith a gwblhawyd ar brosiect Tŷ Hywel 26 i ddarparu llety seneddol ar gyfer 96 o Aelodau, a chamau nesaf y cynlluniau dros y misoedd nesaf.

Nododd y Comisiynwyr y diweddariad, y deialog parhaus â Llywodraeth Cymru rhanddeiliaid yn y cyfryngau, y newidiadau arfaethedig i'r adeiladau a ddefnyddir gan wasanaethau'r Comisiwn (gan gynnwys gweithgarwch gweithredu arfaethedig) a'r wybodaeth ddiweddaraf am y cynlluniau a'r opsiynau ar gyfer swyddfeydd Aelodau ychwanegol a'r camau nesaf.

Bydd ymgynghori pellach yn digwydd ar ôl toriad yr haf gyda chynigion terfynol ar gyfer swyddfeydd yr Aelodau newydd yn cael eu cyflwyno i'r Comisiwn yn gynnar yn nhymor yr hydref i'w hystyried a'u cymeradwyo.

Ar ôl cytuno ar y strategaeth gaffael, cytunodd y Comisiynwyr ar broses gaffael benodol, o dan y rheoliadau caffael cyhoeddus, a fyddai’n bodloni egwyddorion y strategaeth ac yn darparu modd i gyflawni’r amcanion perthnasol. Cafodd y Comisiynwyr ragor o wybodaeth am gwmpas arfaethedig y contract, yn ogystal ag asesiad risg cychwynnol, gwybodaeth lefel uchel am y broses gaffael ar gyfer y prosiect ac amserlen ddangosol ar gyfer y camau nesaf.

Trafododd y Comisiynwyr baramedrau’r amserlen ar gyfer cyflawni’r prosiect hwn, sydd wedi’i ysgogi gan ddiwedd prydles bresennol Tŷ Hywel yn 2032.

Cytunwyd y dylid gweithredu ar gam cyntaf y broses gaffael, sef cyhoeddi Hysbysiad Gwybodaeth Ymlaen Llaw ar gyfer y prosiect, cyn gynted ag y bo’n ymarferol (siŵr o fod ganol mis Chwefror 2024). Byddai hyn yn helpu i lywio’r broses gaffael gyffredinol ar gyfer datrysiad o ran llety erbyn 2032.

Nododd y Comisiynwyr y camau dilynol arfaethedig yn y broses gaffael gyffredinol ar gyfer y prosiect, yn seiliedig ar gyngor cyfreithiol cychwynnol, a oedd yn cynnwys y prif elfennau a ganlyn:

-           cynnal ymarfer caffael cystadleuol i gyflawni prosiect Bae 2032;

-           y byddai'r ymarfer caffael cystadleuol yn canolbwyntio ar Fanyleb Seiliedig ar Allbwn, a fydd yn nodi anghenion a gofynion y Comisiwn.

-           y bydd yr ymarfer caffael cystadleuol yn cael ei gynnal mewn pedwar cam.

Cafodd y Comisiynwyr y wybodaeth ddiweddaraf am gynnydd y prosiect hyd yma, gan nodi’r llwybr lefel uchel dangosol presennol ar gyfer cyflawni’r prosiect, yn ogystal â lefel yr ansicrwydd sy’n rhan annatod o gamau nesaf prosiect o’r math hwn.

Cytunodd y Comisiynwyr ar y strategaeth gaffael amlinellol ar gyfer prosiect Bae Caerdydd 2032, a fydd yn llywio’r gwaith caffael cyffredinol ar gyfer datrysiad llety Bae 2032, gan gynnwys y broses gaffael benodol a’r llwybr a ddilynir.

Nododd y Comisiynwyr yr angen hanfodol i gadw'r tensiwn cystadleuol rhwng y cyfleoedd am ddatblygiad newydd a'r cyfleoedd i adnewyddu, er mwyn sicrhau’r gwerth gorau am arian i’r cyhoedd.

Cafodd y Comisiynwyr y wybodaeth ddiweddaraf am y broses dendro a’r gwerthusiad a gynhaliwyd i benodi cyflenwr gwasanaethau pensaernïol i weithio gyda Chomisiwn y Senedd ar brosiect y Siambr 2026.

Cytunodd y Comisiynwyr ag argymhelliad y panel gwerthuso y dylid penodi Rogers Stirk Harbour Partnership (RSHP), sef enw newydd y Richard Rogers Partnership, i ddatblygu'r opsiwn a'r dyluniad a ffefrir ar gyfer Siambr fwy i wneud lle ar gyfer 96 o Aelodau mewn ymateb i’r gwaith ar Ddiwygio’r Senedd, yn amodol ar gytuno ar y telerau ac amodau terfynol gyda RSHP.

Hefyd, trafododd y Comisiynwyr bwysigrwydd sicrhau bod gwybodaeth ar gael iddynt ei rhannu ag aelodau eu grŵp, a chawsant wybod am aelodaeth arfaethedig y grŵp cyfeirio, y byddai’n cynnwys aelod o bob grŵp, ochr yn ochr ag aelodau’r Comisiwn.

Cytunwyd y byddai uwch swyddogion yn mynd i gyfarfod y grwpiau gwleidyddol unigol, petaent yn cael eu gwahodd i wneud hynny, i rannu’r wybodaeth ddiweddaraf am y prif brosiectau sy’n gysylltiedig â’n ffyrdd o weithio, ac y byddai pecyn gwybodaeth yn cael ei lunio i ateb unrhyw gwestiynau sy’n codi.

Ystyriodd y Comisiynwyr ragdybiaethau cynllunio drafft a gynigiwyd i lywio darpariaeth ar gyfer yr anghenion a fyddai'n deillio o nifer uwch o Aelodau.

Mae cynigion Diwygio’r Senedd i gynyddu maint y Senedd i 96 o Aelodau yn golygu bod angen addasu Tŷ Hywel i ddarparu lle priodol ar gyfer yr anghenion yn sgil cynnydd yn nifer yr Aelodau, a’u staff cymorth, a darparu lle priodol hefyd i staff y Comisiwn, a digon o le ar gyfer nifer uwch o swyddfeydd Gweinidogion Llywodraeth Cymru.

Cymeradwyodd y Comisiynwyr y rhagdybiaethau cynllunio arfaethedig ar gyfer prosiect Tŷ Hywel 2026 ac amserlen lefel uchel i’w mabwysiadu fel man cychwyn i alluogi datblygu opsiynau a chynigion manylach. Fe wnaethant nodi yr hoffent roi ystyriaeth fanylach i’r opsiynau a'r cynlluniau cychwynnol a manwl mewn cyfarfod yn y dyfodol.

Cafodd y Comisiynwyr bapur a chyflwyniad yn nodi Achos Amlinellol Strategol (SOC) ar gyfer anghenion ystad Bae y Comisiwn yn y dyfodol. Mae'n bosibl mai hwn yw'r prosiect mwyaf a mwyaf cymhleth i’r Comisiwn ymgymryd ag ef. Byddai'n sicrhau anghenion lle o ran swyddfeydd tymor hir y Senedd, y Comisiwn a Llywodraeth Cymru yn y Bae, ger adeilad y Senedd ei hun. Paratowyd yr Achos Amlinellol Strategol gan ymgynghorwyr eiddo proffesiynol y Comisiwn (Avison Young).

Roedd y Comisiwn wedi cytuno i ddilyn proses 'Llyfr Gwyrdd' Trysorlys EF / Llywodraeth Cymru. O fewn y broses honno, Achos Amlinellol Strategol yw cam cyntaf methodoleg achos busnes tri cham sy'n addas ar gyfer prosiectau o'r cymhlethdod hwn a'r gost hon.

Cymeradwyodd y Comisiwn Achos Amlinellol Strategol y Bae 2032, sy'n rhoi mandad i swyddogion y Comisiwn symud prosiect Bae 2032 i’w gam nesaf, drwy ddatblygu Achos Busnes Amlinellol a gweithio ymhellach ar y fersiwn gychwynnol o’r ffordd ymlaen a ffefrir a nodir yn yr Achos Amlinellol Strategol o ran datblygu cyfleuster newydd ar blot Sgwâr y Cynulliad y drws nesaf. Nododd y Comisiynwyr nad yw'r Achos Amlinellol Strategol yn ceisio nac yn gofyn am unrhyw benderfyniad ar unrhyw opsiwn llety gan y Comisiwn, ac y byddai ystyriaethau o'r fath yn codi yn ddiweddarach yn y broses. Cytunwyd y dylid paratoi nodyn briffio gwybodaeth ar gyfer yr Aelodau maes o law.

Nododd y Comisiynwyr hefyd y byddai datblygu'r Achos Busnes Amlinellol yn ei gwneud yn ofynnol i gaffael gwasanaethau proffesiynol allanol i’w ddrafftio ac yna sicrhau ei ansawdd, ac y byddai cynigion yn hyn o beth yn cael eu hystyried gan y Bwrdd Gweithredol maes o law.

Rhoddwyd gwybod i’r Comisiynwyr am y prosiect a’r gwaith sydd ar y gweill i ddatblygu’r opsiwn a’r dyluniad a ffefrir ar gyfer Siambr gynyddol ar gyfer 96 Aelod, ar gyfer y Seithfed Senedd.

Cytunwyd ar y weledigaeth lefel uchel a’r cwmpas ar gyfer y prosiect, i alluogi’r gwaith o gaffael gwasanaethau dylunio a phensaernïol i ddechrau ym mis Hydref, ar y sail y dylai gwaith archwilio ystyried yn eang y posibiliadau o fewn ffiniau senedd gylchol, a bod gofynion o ran hygyrchedd i'w cynnwys yn y fanyleb, ac y dylai tendrau ar gyfer gwasanaethau dylunio a phensaernïol fynd y tu hwnt i faterion hygyrchedd ffisegol.

Nododd y Comisiynwyr y gwaith arfaethedig ar gyfer y prosiect, a chroesawyd y ffaith y byddai grŵp cyfeirio o Aelodau yn cymryd rhan yn yr hyn a fyddai’n broses ailadroddol, a fyddai’n dychwelyd i’r Comisiwn ar gyfer penderfyniadau, ar yr adeg briodol.

Cafodd y Comisiynwyr ddiweddariad ar y gwaith sydd ar y gweill i ddatblygu'r opsiynau strategol ar gyfer llety yn y dyfodol fel rhan o brosiect Bae 2032. Nodwyd y wybodaeth gefndir, y gwnaethant gais amdani, mewn perthynas â chyfleoedd blaenorol o ran yr ystâd a ystyriwyd gan y Comisiwn a'i ragflaenwyr. 

Nododd y Comisiynwyr y diweddariad ac amserlenni ar gyfer dyfodol y prosiect (fel sy'n hysbus ar hyn o bryd), gan gynnwys penderfyniadau a fydd yn ofynnol yn 2023-2024 a’r angen i ymgysylltu ag Aelodau’n ehangach.

Nododd y Comisiynwyr y diweddariad bod adleoli cyfleusterau a gwasanaethau Comisiwn y Senedd a ddarperir yn swyddfa Bae Colwyn i swyddfa yn swyddfeydd Llywodraeth Cymru yn Sarn Mynach (Cyffordd Llandudno) wedi’i gwblhau.

Nododd y Comisiynwyr y diweddariad am gyfeiriad a chynnydd eu rhaglen newid mawr 'Ffyrdd o Weithio', wrth i'r gwaith symud y tu hwnt i gyfnod y Cynllun Gweithredu Cychwynnol i'w gyfnod cyflawni strategol.

Cafodd y Comisiynwyr ddiweddariad ar gyngor proffesiynol cychwynnol ynghylch opsiynau hyfyw sicrhau llety sy'n diwallu anghenion hirdymor y Senedd a'r Comisiwn. Roedd y cyngor yn seiliedig ar yr anghenion a'r gofynion drafft y cytunwyd arnynt ym mis Rhagfyr 2022.

Trafododd y Comisiynwyr arwyddocâd ystyriaethau datblygu cynaliadwy a chyfle cyfartal ynghyd â phwysigrwydd cael safbwynt hirdymor ar werth i bwrs y wlad.

Cytunodd y Comisiynwyr yn unfrydol y dylai swyddogion fwrw ymlaen â'r opsiynau prosiect ar y rhestr fer a bwrw ymlaen â drafftio cam cyntaf yr achos busnes ar gyfer prosiect Bae 2032 (yr Achos Amlinellol Strategol) ar sail y cyngor a ddarparwyd. 

Cytunodd y Comisiynwyr i gael diweddariad yng nghyfarfod mis Gorffennaf, ynghylch cynnydd o ran archwilio'r holl opsiynau.

Nododd y Comisiynwyr gynnydd y prosiect i adleoli cyfleusterau a gwasanaethau Comisiwn y Senedd a ddarperir yn swyddfa Bae Colwyn i swyddfa yn swyddfeydd Llywodraeth Cymru yn Sarn Mynach (Cyffordd Llandudno).

A - Cyflwyniad - Themâu sy’n dod i’r amlwg ar ôl  ymgysylltu â’r Aelodau ynghylch Ffyrdd o Weithio

Cyflwynwyd gwybodaeth i'r Comisiynwyr am y themâu a oedd yn dod i'r amlwg ar ôl ymgysylltu â’r Aelodau ym mis Tachwedd a mis Rhagfyr - proses a gynhaliwyd ar y cyd â'r Bwrdd Taliadau.

Diben y broses oedd cael dealltwriaeth well o anghenion yr Aelodau o ystyried eu ffyrdd o weithio yn y tymor canolig i’r hirdymor. Cyflwynwyd barn yr aelodau ar ffurf pum prif thema:

·       Rhaglen Ffyrdd o Weithio - themâu cyffredinol

·       Gwasanaethau’r Comisiwn

·       Cyflogau a Lwfansau

·       Canolfannau gwaith

·       Diwygio’r Senedd

Trafododd y Comisiynwyr gryfder y teimladau mewn perthynas â rhai meysydd, ac roedd barn yr Aelodau am y syniad o sefydlu canolfannau fel swyddfeydd y gallent eu rhannu’n un enghraifft o gynnig na fyddai’n fuddiol i’r Comisiwn fwrw ymlaen ag ef. Tynnwyd sylw at y gwahaniaeth rhwng y math o 'ganolfan' a oedd yn cael ei thrafod yn gyffredinol ymysg yr Aelodau, a lleoliadau y gallai’r Comisiwn eu darparu, fel hwnnw yn y Gogledd, a oedd yn caniatáu i staff y Comisiwn weithio mewn rhannau o Gymru heblaw'r ystâd ym Mae Caerdydd.

Roedd y Comisiynwyr o’r farn bod casgliadau’r broses yn ddiddorol, ac roeddent yn cydnabod y byddai rhai agweddau ar y cyflwyniad yn arbennig o ddefnyddiol i’r Bwrdd Taliadau o ystyried ei flaenraglen waith arfaethedig.  Dywedodd y Comisiynwyr ei bod yn ymddangos bod angen rhoi sylw pellach i rai materion a oedd yn bwysig i'r garfan bresennol o Aelodau, er enghraifft ffactorau a allai ddylanwadu ar allu Aelodau i gadw staff.

Yn ogystal â'r rhoi adborth i’r rhai a fyddai'n defnyddio'r wybodaeth a gasglwyd i lywio gwasanaethau a chymorth yn y dyfodol, cytunodd y Comisiynwyr y byddai'n ddefnyddiol rhoi adborth ehangach i'r Aelodau. Cytunwyd y dylid paratoi nodyn.

B - y diweddaraf am symud y swyddfa yng Ngogledd Cymru

Nododd y Comisiynwyr fod gwaith yn mynd rhagddo i gwblhau’r drwydded gyda Llywodraeth Cymru ac y bydd y brydles bresennol yn dod i ben ar 30 Mehefin 2023. Cafodd y Comisiynwyr y wybodaeth ddiweddaraf am y trafodaethau â Llywodraeth Cymru i sicrhau bod y lle ar gyfer Comisiwn y Senedd yn y dyfodol yn annibynnol drwy osod yr arwyddion priodol yn Sarn Mynach.

Fel rhan o’r Rhaglen Ffyrdd o Weithio, trafododd y Comisiynwyr yr achos busnes dros ddarparu’r cyfleusterau sydd ar gael ar hyn o bryd i staff ac Aelodau yn swyddfa’r Comisiwn ym Mae Colwyn drwy gytundeb trwydded cydleoli gyda Llywodraeth Cymru yn ei swyddfa yn Sarn Mynach (Cyffordd Llandudno).

Roedd yr achos busnes yn nodi'r achos dros newid; cwmpas, amcanion, anghenion busnes a'r hyn y gellir ei gyflawni; a rhestr fer o opsiynau ynghyd â'r costau a gwerthusiad.

Trafododd y Comisiynwyr yr angen i ofalu am staff, yn ogystal â’r goblygiadau i ddefnyddwyr eraill y swyddfeydd, gan gynnwys Aelodau a'r cyhoedd. Hefyd, trafodwyd pwysigrwydd cael swyddfeydd y tu allan i Gaerdydd, a gallu cynnig swyddi ar ran y Senedd mewn rhannau eraill o Gymru. Daethant i’r casgliad y dylid pwysleisio annibyniaeth y swyddfa ar Lywodraeth Cymru, gan gynnwys drwy frandio priodol, ac y dylid cyfathrebu’r newid yn glir ynghyd â gwella’r wybodaeth sydd ar gael am y ffyrdd y gellir defnyddio’r gofodau. Bydd diweddariad yn cael ei ddarparu yn dilyn trafodaethau manylach.

Cytunodd y Comisiynwyr i arfer y cymal terfynu ym mhrydles Swyddfa Gogledd Cymru (Prince's Park) a symud swyddfa’r Comisiwn yng Ngogledd Cymru. Byddai'r lleoliad newydd yn darparu man gwaith ar wahân ac ystafell gyfarfod hybrid, gyda storfa a chegin, yn ogystal â mynediad at ystod o gyfleusterau ar y cyd.

Yn amodol ar gyngor cyfreithiol a chyngor proffesiynol y gwasanaeth ystadau, disgwylir y byddai’r newid yn digwydd ym mis Mehefin 2023.

Nododd y Comisiynwyr gynnydd y prosiect, y prif risgiau o ran cyflawni a'r camau nesaf. Hefyd, trafododd y Comisiynwyr faterion yn ymwneud ag opsiynau hirdymor ar gyfer ystâd Tŷ Hywel ar ôl i’r brydles ddod i ben yn 2032, gan nodi y byddent yn gofyn am gyngor proffesiynol, wedi’i lywio gan drafodaethau’r Comisiwn. Cytunwyd y dylid cynnwys pob opsiwn at ddiben gofyn am gyngor ac y byddai trafodaethau pellach yn cael eu cynnal gyda swyddogion Llywodraeth Cymru mewn perthynas â'r safle ger y Senedd.

Rhoddwyd diweddariad i’r Comisiynwyr am y cynnydd a wnaed o ran cyflawni Cynllun Gweithredu Interim Ffyrdd o Weithio a materion a risgiau cysylltiedig.

Cytunodd y Comisiynwyr y dylid gwneud gwaith paratoi a gweithgarwch ymgysylltu rhesymol, fel y nodir yn yr adroddiad, i lywio penderfyniadau yn ddiweddarach yn y flwyddyn, ac yna ar gyfer y tymor canolig i'r tymor hwy, mewn perthynas â ffyrdd o weithio.

Roeddent yn cefnogi'r bwriad i gynnal yr ymarfer ymgysylltu ehangach mewn cydweithrediad â'r Bwrdd Taliadau Annibynnol.

Nododd y Comisiynwyr wybodaeth hefyd am y model amlinellol y cytunodd y Bwrdd Gweithredol arno o ran rheoli’r ffordd y bydd staff y Comisiwn yn dychwelyd i'r ystâd. Roedd hwn yn nodi egwyddorion trefnu presenoldeb yn seiliedig ar weithgareddau a hierarchaeth o ran anghenion busnes.