Cyfarfodydd

Ystyriodd y Pwyllgor Busnes bapur yn cynnwys opsiynau ar gyfer cyfyngu neu roi rhwystrau ar y gallu i lefarwyr pleidiau ofyn cwestiynau a gyflwynir yn yr un sesiynau cwestiynau llafar ag y maent yn cael eu galw i ofyn cwestiynau llefarwyr. Cymeradwyodd y Rheolwyr Busnes gynnig a wnaed gan y Llywydd y dylid diwygio canllawiau i nodi y byddai nifer y cwestiynau heb rybudd y byddai llefarydd yn cael eu galw i'w gofyn yn cael ei leihau gan un cwestiwn, os oes ganddynt gwestiwn wedi'i gyflwyno ar y papur busnes ar gyfer y sesiwn honno o gwestiynau llafar.

Trafododd y Rheolwyr Busnes y posibilrwydd o dreialu dull o gyflwyno terfynau amser ar gyfer atebion gweinidogol i gwestiynau llefarwyr. Cytunodd y Trefnydd i drafod gyda Gweinidogion yr angen i sicrhau bod yr atebion a roddir yn gryno.

Trafododd y Pwyllgor Busnes nifer o faterion yn gysylltiedig â rheolau ac arferion yn ymwneud â chwestiynau ysgrifenedig.

Nododd y Rheolwyr Busnes:

• fod y Llywydd wedi gofyn i'r Swyddfa Gyflwyno weithredu'r cyfnod o dri mis lle na ellir gofyn yr un cwestiwn i'r un Gweinidog fel cyfnod treigl o fis Ionawr 2026 ymlaen, yn lle'r dull tymhorol presennol;
• fod offeryn AI yn cael ei ddatblygu ar hyn o bryd i gynorthwyo'r Swyddfa Gyflwyno i wirio'r holl gwestiynau yn erbyn y rhai a atebwyd yn flaenorol; a
• byddai effeithiolrwydd yr offeryn AI yn cael ei asesu cyn gwneud unrhyw newidiadau i reolau ac arferion cwestiynau ysgrifenedig, megis symud o gyfnod o dri i chwe mis lle na ellir gofyn yr un cwestiynau neu gwestiynau tebyg.

Trafododd y Pwyllgor Busnes y diwygiadau arfaethedig i ganllawiau’r Llywydd ar drafodion rhithwir a hybrid o ran y lleoliadau y caniateir i Aelodau fwrw eu pleidleisiau ohonynt yn ystod trafodion y Cyfarfod Llawn, cyn nodi ei fod yn fodlon â’r newidiadau hyn. Caiff y canllawiau diwygiedig eu cyhoeddi cyn gynted â phosibl.

Nododd y Pwyllgor Busnes y bydd yn trafod rhagor o ddiwygiadau i agweddau eraill ar y canllawiau ynghylch trafodion y pwyllgorau, yng ngoleuni'r newidiadau hyn a'r sylwadau a wnaed gan Fforwm y Cadeiryddion, mewn cyfarfod dilynol.

Dywedodd y Rheolwyr Busnes eu bod yn fodlon â'r dull a gymerwyd tuag at y cyfarfodydd ychwanegol ar gyfer cyflwyno ei raglen waith weithdrefnol hyd yn hyn. Cytunodd y Pwyllgor Busnes mai’r bwriad fyddai i bapurau ar gyfer y cyfarfodydd ychwanegol gael eu hanfon bedwar diwrnod gwaith cyn y cyfarfodydd.

Cytunodd y Pwyllgor Busnes y byddai'r cyfarfodydd ychwanegol yn parhau i gael eu cynnal yn breifat.

Dywedodd y Llywydd mai ei dewis hi fyddai cynnal cyfarfodydd yn bersonol pryd bynnag y bo modd, ond y byddai cyfleusterau hybrid ar gael.

Nodwyd, pe bai angen sesiwn gyhoeddus cyn cwblhau'r gwaith gweithdrefnol, byddai hyn yn cael ei drefnu.

Cytunodd y Pwyllgor Busnes y gall Rheolwyr Busnes ddod â swyddog grŵp gwleidyddol nad yw'n cymryd rhan i arsylwi yn y cyfarfodydd gweithdrefnol ychwanegol, a gall y Trefnydd ddod â swyddog grŵp gwleidyddol nad yw'n cymryd rhan a swyddog Llywodraeth Cymru.

Nododd y Llywydd fod trefniadau ar gyfer Aelodau nad ydynt mewn grŵp gwleidyddol i gael eu cadw yn unol â chyfarfodydd cyfredol y Pwyllgor Busnes.

Trafododd y Pwyllgor Busnes Bapur 1 - Gwaith gweithdrefnol: Blaenoriaethu ("Papur 1").

Nododd y Llywydd y diddordeb oedd gan aelodau'r Pwyllgor Busnes yn y gwaith hwn a'r rôl y byddant yn ei chwarae wrth ymgysylltu ag aelodau eu grwpiau gwleidyddol ynglŷn â'r rhaglen waith weithdrefnol.

Cytunodd y Pwyllgor Busnes ar y faenoriaeth a awgrymir ym Mhapur 1, yn amodol ar y sylwadau a'r gwelliannau canlynol:

• Mynegodd Jane Dodds a Heledd Fychan eu pryderon ynglŷn â'r awgrym o ddflaenoriaethu cwotâu amrywiaeth deddfwriaethol.
• Nododd y Pwyllgor Busnes y cwestiwn o gymhwysedd deddfwriaethol yng nghyddestun cwotâu amrywiaeth ddeddfwriaethol, a chyhoeddiad Llywodraeth Cymru o’r Canllawiau amrywiaeth a chynhwysiant ar gyfer pleidiau gwleidyddol cofrestredig yng Nghymru.
• Awgrymodd Heledd Fychan y dylid cynnwys adolygiad y Pwyllgor Cyllid o weithdrefnau'r gyllideb yn y rhaglen waith weithdrefnol. Nododd y Llywydd efallai na fydd y gwaith hwn yn bosibl yn ystod tymor y Senedd hon, oherwydd maint y gwaith sydd ei angen, ond awgrymodd ysgrifennu at y Pwyllgor Cyllid i ofyn am ragor o wybodaeth cyn penderfynu a yw gwaith pellach ar yr eitem hon yn bosibl cyn diwedd y Chweched Senedd.

·       Mewn perthynas â threfnu busnes yn y Seithfed Senedd, mae amser i'w neilltuo o fewn y rhaglen waith i ddatblygu fframwaith a argymhellir ar gyfer trefnu busnes yn y Seithfed Senedd.

·       Dylid rhoi ystyriaeth bellach i eitem y broses cydsyniad deddfwriaethol cyn penderfynu a yw gwaith pellach ar yr eitem hon yn bosibl cyn diwedd y Chweched Senedd.

·       Mae'r eitemau canlynol, a awgrymir i'w dadflaenoriaethu ym Mhapur 1, i gael eu cynnwys yn y rhaglen waith weithdrefnol:

• Gweithredu pwyllgorau (i'w hymgorffori yn yr eitem ar drefnu busnes);
• Proses cydsynio deddfwriaethol (i benderfynu a yw gwaith pellach yn bosibl cyn diwedd y Chweched Senedd);
• Adolygiad y Pwyllgor Cyllid o weithdrefnau’r gyllideb (i benderfynu a yw gwaith pellach yn bosibl cyn diwedd y Chweched Senedd); a
• Gweddill yr amser a ddyrennir i Aelodau o fewn eitemau'r Cyfarfod Llawn (i'w hymgorffori yn yr eitem ar drefnu busnes).

Cytunodd y Pwyllgor Busnes i gyhoeddi adroddiad i esbonio ei raglen waith weithdrefnol a'r penderfyniadau y mae wedi'u gwneud o ran blaenoriaethu.