Cyfarfodydd

Nododd y Comisiynwyr yr adroddiad a gyhoeddwyd ar 2 Rhagfyr 2025 yn dilyn y sesiwn graffu a gynhaliwyd ar 2 Hydref. Byddai’r Comisiynwyr yn cael ymateb drafft yn y cyfarfod ym mis Ionawr 2026. 

Adolygodd y Comisiynwyr yr Adroddiad Blynyddol a Chyfrifon drafft ar gyfer y cyfnod o 1 Ebrill 2024 i 31 Mawrth 2025.

Roedd y Pwyllgor Archwilio a Sicrwydd Risg wedi argymell cymeradwyo'r adroddiad gan y Comisiwn yn ei gyfarfod ar 23 Mehefin.

Ceisiodd y Comisiynwyr eglurder ynghylch yr adroddiad archwilio mewnol ar urddas a pharch.

Cymeradwyodd y Comisiynwyr yr adroddiad terfynol, yn amodol ar unrhyw fân gywiriadau neu ddiwygiadau. 

Byddai’r Adroddiad yn cael ei lofnodi a’i osod gan Archwilydd Cyffredinol Cymru a’i gyhoeddi ar-lein ar dudalennau gwe adroddiad blynyddol penodol, gyda nifer cyfyngedig o gopïau printiedig yn cael eu cynhyrchu, cyn diwedd tymor yr haf.

Roedd y Pwyllgor Cyfrifon Cyhoeddus a Gweinyddiaeth Gyhoeddus wedi gwneud chwe argymhelliad i’r Comisiwn yn ei Adroddiad Craffu ar Adroddiad Blynyddol a Chyfrifon 2023-24.

Trafododd y Comisiynwyr yr ymatebion a chytunwyd arnynt. Bydd y llythyr yn cael ei ddarparu i’r Pwyllgor Cyfrifon Cyhoeddus a Gweinyddiaeth Gyhoeddus a fydd yn ei gyhoeddi fel rhan o bapurau cyfarfod y pwyllgor.

Nododd y Comisiynwyr adroddiad y Pwyllgor Cyfrifon Cyhoeddus a Gweinyddiaeth Gyhoeddus, a gyhoeddwyd ar 29 Tachwedd. Bydd ymateb i’r adroddiad hwn yn cael ei lunio maes o law.

Nododd y Comisiynwyr yr ymateb y byddai’r Prif Weithredwr yn ei anfon at y Pwyllgor Cyfrifon Cyhoeddus a Gweinyddiaeth Gyhoeddus i roi diweddariadau pellach o ran argymhellion yr Adroddiad Craffu ar Gyfrifon 2022-23. Roedd hyn yn cynnwys:

• cynnydd o ran gweithredu prosiectau fel rhan o'r Strategaeth Carbon Niwtral;
• gwaith y grwpiau sy'n edrych ar rôl Deallusrwydd Artiffisial yn y Senedd; a
• gwaith a wnaed i annog ceisiadau gan unigolion o amrywiaeth o gefndiroedd economaidd-gymdeithasol a daearyddol.

Roedd y llythyr hefyd yn rhoi'r wybodaeth ddiweddaraf am brosiectau a roddwyd ar waith yn sgil y Gronfa Prosiectau a chontractau a ddyfarnwyd i gyflenwyr o Gymru.

Cymeradwyodd y Comisiynwyr ddrafft terfynol yr Adroddiad Blynyddol a Chyfrifon ar gyfer 2023-24, yn amodol ar unrhyw fân gywiriadau neu newidiadau golygyddol. 

Bydd yr Adroddiad yn cael ei lofnodi a'i osod gan Archwilydd Cyffredinol Cymru a'i gyhoeddi ar-lein ar dudalennau gwe Adroddiad Blynyddol penodol.

Adolygodd y Comisiynwyr y drafft cyfredol o Adroddiad Blynyddol a Chyfrifon y Comisiwn ar gyfer y cyfnod rhwng 1 Ebrill 2023 a 31 Mawrth 2024 ar gyfer ei ystyried.

Gwnaethant nodi i'r broses o gwblhau fersiwn gyflawn o Adroddiad Blynyddol a Chyfrifon y Comisiwn gael ei gohirio oherwydd effaith nas datryswyd yn ymwneud â dyfarniad McCloud ar gyfrifiadau pensiwn. Mae'r oedi cyn cael y wybodaeth angenrheidiol am bensiynau gan Gynllun Pensiwn y Gwasanaeth Sifil yn fater sy'n effeithio ar yr holl lywodraethau a chyrff cyhoeddus sydd â staff yng Nghynllun Pensiwn y Gwasanaeth Sifil. Dywedodd y Prif Swyddog Cyllid fod Trysorlys EF wedi cyhoeddi FReM diwygiedig yn ddiweddar, gyda diwygiad cydymffurfio neu egluro a'r datgeliad gofynnol a nodir yn y diwygiad i egluro’r oedi. Yng ngoleuni'r newid hwn, byddai Archwilio Cymru yn adolygu geiriad y farn archwilio a’i diwygio i'r Adroddiad Blynyddol a Chyfrifon allu cael eu cwblhau.

Trafododd y Comisiynwyr adrannau naratif yr adroddiad a gofynnwyd am i’r wybodaeth ddiweddaraf am absenoldeb hirdymor oherwydd salwch gael ei darparu mewn cyfarfod yn y dyfodol. Gwnaethant hefyd drafod yr adroddiad gwariant gyda chyflenwyr Cymreig, a gofynnwyd am ragor o waith yn y rhan o'r adroddiad sy’n ymwneud ag Urddas a Pharch.

Cytunodd y Comisiynwyr i gael yr Adroddiad terfynol yn y cyfarfod ym mis Gorffennaf ar gyfer ei gymeradwyo, gyda’r adroddiad terfynol wedyn yn cael ei lofnodi gan Archwilydd Cyffredinol Cymru a’i osod, a’i gyhoeddi ar-lein.

Trafododd y Comisiynwyr eu hadroddiad blynyddol a’u cyfrifon ar gyfer y cyfnod o 1 Ebrill 2022 i 31 Mawrth 2023. Cawsant sicrwydd bod y Pwyllgor Archwilio a Sicrwydd Risg wedi argymell cymeradwyo’r adroddiad, a chytunwyd ar y fersiwn derfynol i'w chyhoeddi, yn amodol ar unrhyw fân gywiriadau neu olygiadau.

Ystyriodd y Comisiynwyr wybodaeth i’w darparu i’r Pwyllgor Cyfrifon Cyhoeddus a Gweinyddiaeth Gyhoeddus mewn dau faes yn dilyn Craffu ar y Cyfrifon ar gyfer 2021-22. Roedd y rhain yn ddadansoddiad o'r prosiectau a weithredwyd fel rhan o’r gronfa brosiectau, a chrynodeb o ganlyniadau'r arolwg staff a'r arolwg pwls. Gofynnodd y Comisiynwyr am rywfaint o eglurhad a chytunwyd ar gynnwys y llythyr at y Pwyllgor.

Ar 7 Rhagfyr 2022, cytunodd y Comisiynwyr ar eu hymateb i’r saith o argymhellion yn adroddiad y Pwyllgor Cyfrifon Cyhoeddus a Gweinyddiaeth Gyhoeddus ar Graffu ar Gyfrifon 2020-21.

Nododd y Comisiynwyr y llythyr sy’n rhoi rhagor o wybodaeth i’r Pwyllgor Cyfrifon Cyhoeddus a Gweinyddiaeth Gyhoeddus yn dilyn y sesiwn graffu ar adroddiad blynyddol a chyfrifon y Comisiwn ar gyfer 2021-22.

Yn benodol, trafododd y Comisiynwyr y rhaglenni cymorth a gynigir i staff y Comisiwn, gan gytuno y dylid cadw llygad barcud ar y sefyllfa. Hefyd, cafodd trefniadau eraill o ran cyflogaeth eu trafod, fel staff cymorth yr Aelodau a chontractwyr y Comisiwn.

Cymeradwyodd y Comisiynwyr fersiwn derfynol yr Adroddiad Blynyddol a Chyfrifon, yn cwmpasu’r cyfnod o 1 Ebrill 2021 hyd at 31 Mawrth 2022, yn amodol ar unrhyw fân waith cywiro neu olygu.

Wrth wneud hynny, trafodwyd elfennau yn ymwneud â'r ieithoedd swyddogol, a chytunwyd i gyfeirio atynt yn fwy amlwg o fewn blaenoriaethau'r Comisiwn ar gyfer y flwyddyn i ddod.

Croesawodd y Comisiynwyr y dull o gyhoeddi’r adroddiad ar ffurf cyfres newydd o dudalennau ar y we sy’n cyflwyno uchafbwyntiau’r adroddiad (a’r adroddiadau blynyddol eraill – Amrywiaeth a Chynhwysiant, y Cynllun Ieithoedd Swyddogol a Chynaliadwyedd). Daethpwyd i’r casgliad bod hyn yn gwneud cynnwys yr adroddiad yn llawer mwy hygyrch a hylaw.

Bydd yr Adroddiad yn cael ei lofnodi a’i osod ar ran Archwilydd Cyffredinol Cymru ac fe’i cyhoeddir ar-lein cyn diwedd tymor yr haf.

Nododd y Comisiynwyr y wybodaeth ychwanegol a ddarparwyd i'r Pwyllgor Cyfrifon Cyhoeddus a Gweinyddiaeth Gyhoeddus yn dilyn y sesiwn graffu ym mis Hydref.

Cymeradwyodd y Comisiynwyr adroddiad blynyddol a chyfrifon Comisiwn y Senedd ar gyfer y cyfnod o 1 Ebrill 2019 i 31 Mawrth 2020. 

Roedd y Comisiynwyr wedi trafod fersiwn ddrafft o adroddiad blynyddol a chyfrifon y Comisiwn yn ymwneud â 1 Ebrill 2019 i 31 Mawrth 2020, er mwyn rhoi sylwadau cyn cwblhau'r adroddiad.

Roedd y Comisiynwyr yn croesawu’r gwaith hyd yma gan gydnabod y byddai diweddariadau ychwanegol i adlewyrchu digwyddiadau diweddar. Awgrymwyd hefyd y dylid cynnwys adran edrych ymlaen.

Bydd yr adroddiad yn cael ei osod a'i gyhoeddi ar-lein yn dilyn cymeradwyaeth derfynol ym mis Mehefin.

Copi caled yn unig

Cytunodd y Comisiynwyr ar Adroddiad Blynyddol a Chyfrifon y Comisiwn ar gyfer y cyfnod 1 Ebrill 2018 i 31 Mawrth 2019.

Gwnaethant nodi un mater a oedd wedi codi ers eu trafodion blaenorol, yn ymwneud â dyfarniad diweddar iawn yn y Goruchaf Lys a oedd wedi effeithio ar rwymedigaethau Cynllun Pensiwn Aelodau'r Cynulliad yng nghyfrifon y Comisiwn.

Byddai'r adroddiad yn cael ei gymeradwyo gan Archwilydd Cyffredinol Cymru a'i osod cyn diwedd tymor yr haf.

Drafft fel ar 3 Mehefin (Saesneg yn unig)

Trafododd y Comisiynwyr fersiwn ddrafft o adroddiad blynyddol a chyfrifon Comisiwn y Cynulliad Cenedlaethol ar gyfer y cyfnod 1 Ebrill 2018 hyd at 31 Mawrth 2019, ac roeddent yn fodlon ar yr hyn a welwyd.

Bydd y fersiwn derfynol i’w chymeradwyo ym mis Gorffennaf, ac yna caiff ei gosod erbyn diwedd tymor yr haf. Bydd ar gael ar-lein.

Cymeradwyodd y Comisiynwyr y drafft o'u Hadroddiad Blynyddol a Chyfrifon, yn cwmpasu 1 Ebrill 2017 hyd at 31 Mawrth 2018, yn amodol ar unrhyw fân waith cywiro neu olygu. Cytunwyd y byddai'r adroddiad yn cael ei osod cyn diwedd tymor yr haf a'i gyhoeddi ar-lein.

Cafodd y Comisiynwyr fersiwn ddrafft o adroddiad blynyddol a chyfrifon Comisiwn y Cynulliad Cenedlaethol ar gyfer y cyfnod 1 Ebrill 2016 hyd at 31 Mawrth 2017.

Cymeradwyodd y Comisiynwyr yr adroddiad, yn amodol ar fân newidiadau i ystyried sylwadau gan Bwyllgor Archwilio a Sicrwydd Risg Comisiwn y Cynulliad a chan Gomisiynwyr; ynghyd â phroses prawfddarllen derfynol, fformatio a brandio.

Caiff y fersiwn derfynol ei gosod yn Gymraeg ac yn Saesneg cyn diwedd tymor yr haf, a bydd ar gael ar-lein a thrwy nifer cyfyngedig o gopïau argraffedig.

Derbyniodd y Bwrdd yr Adroddiad Blynyddol a Chyfrifon drafft ar gyfer 2016-17 a diolchwyd am eu cyfraniadau.

Roedd Adroddiad drafft yn cael ei anfon i Swyddfa Archwilio Cymru a'r Pwyllgor Archwilio a Sicrwydd Risg, gyda drafft terfynol yn cael ei gyflwyno i'r Comisiwn ar 17 Gorffennaf ac yn cael ei gyhoeddi ar ôl hynny.

CAM I'W GYMRYD: Y Bwrdd Rheoli i roi gwybod am unrhyw newidiadau pellach erbyn 26 Mai.

Eitem lafar.

Roedd yr Adroddiad blynyddol a'r cyfrifon ar fin cael eu cwblhau a gofynnwyd i'r Bwrdd roi gwybod am unrhyw sylwadau erbyn hanner dydd 13 Mai, cyn i'r drafft terfynol gael ei anfon i Swyddfa Archwilio Cymru ei adolygu. Rhoddodd y Bwrdd ganmoliaeth i Nia Morgan a'r tîm Cyllid, Chris Warner ac eraill am eu gwaith ar yr adroddiad.

ACARAC (30) Papur 9 - Paratoi ar gyfer Adroddiad Blynyddol a Chyfrifon y Comisiwn 2015-16, a’u symleiddio

8.1        Rhannodd Nicola fersiwn ddrafft o’r Adroddiad Blynyddol a’r Cyfrifon, a baratowyd gan y Pennaeth Cyllid a benodwyd yn ddiweddar, i adlewyrchu canllawiau 'Simplifying and Streamlining Accounts' Trysorlys Ei Mawrhydi.  Bydd y gyfres interim o gyfrifon yn profi’r cynllun newydd hwn a chroesawodd y Pwyllgor y newidiadau a ddrafftiwyd hyd yn hyn.  Gofynnwyd i'r swyddogion beidio â thanbrisio'r gwaith sydd ynghlwm â pharatoi'r gyfres interim o gyfrifon, o ystyried y newidiadau yng nghynllun y ddogfen.  

Camau gweithredu

-        Nicola i gyflwyno gwaith archwilio interim ym mis Chwefror. 

4.1 Trafododd yr Aelodau y dystiolaeth a gafwyd, gan gytuno i edrych eto ar y mater hwn ar ôl cael y wybodaeth ychwanegol gan Gomisiwn y Cynulliad.

PAC(4)-24-14 papur 1

Papur briffio gan y Gwasanaeth Ymchwil

Peter Black AC - Comisiynydd

Claire Clancy, Prif Weithredwr a Chlerc y Cynulliad

Nicola Callow – Cyfarwyddwr Cyllid

2.1 Trafododd y Pwyllgor Adroddiad Blynyddol a Chyfrifon Comisiwn y Cynulliad 2013 – 2014, gan holi Peter Black AC, Comisiynydd, Claire Clancy, Prif Weithredwr a Chlerc y Cynulliad, a Nicola Callow, Cyfarwyddwr Cyllid y Cynulliad.

2.2 Cytunodd Claire Clancy:

·       i ddarparu amlinelliad o'r camau a gymerwyd yn dilyn y digwyddiad twyll

·       i ddarparu manylion pellach ynghylch llithriad y prosiect Adnoddau Dynol â'r Gyflogres

·       i anfon darn o Adroddiad Cydraddoldeb Blynyddol 2013-14 sy'n dangos y cydbwysedd rhwng y rhywiau yn ôl gradd 

·       i ddarparu amlinelliad o raddau effeithlonrwydd ynni Tŷ Hywel a'r Senedd

·       i ddarparu gwybodaeth fanwl am y costau TGCh ar gyfer 2013-14, gan gynnwys y costau rhedeg arferol a'r gwariant a wnaed fel rhan o'r prosiect i ddod â darpariaeth TGCh yn fewnol

Cyhoeddir Adroddiad Blynyddol a Chyfrifon y Comisiwn ar-lein ar  11 Gorffennaf. Anfonir copïau at yr Aelodau cyn diwedd y tymor a bydd rhywfaint o gopïau ar gael, gyda chrynodeb, yn nigwyddiadau'r Comisiwn dros yr haf. 

Cytunodd y Comisiynwyr ar yr adroddiad drafft, yn amodol ar nifer fach o newidiadau.

Cafodd amlinelliad arfaethedig o’r Adroddiad Blynyddol ei gyflwyno er mwyn i’r Comisiwn ei ystyried. Cytunwyd ar y fframwaith.

Cam i’w gymryd: Swyddogion i barhau gyda’r gwaith ar yr adroddiad.

Papur 3

Mae Adroddiad Blynyddol Comisiwn y Cynulliad ar gyfer 2011-12 yn rhoi trosolwg strategol ar flaenoriaethau strategol Comisiwn y Cynulliad, ac yn rhoi pwyslais cryf ar adeiladu Cynulliad ar gyfer y dyfodol

Caiff yr Adroddiad Blynyddol ei gyhoeddi arlein ar 12 Gorffennaf a chaiff y ddogfen lawn, gan gynnwys cyfrifon, ei gosod yn ffurfiol erbyn diwedd y tymor.

Cytunodd y Comisiynwyr ar yr adroddiad.

Bydd Adroddiad Blynyddol Comisiwn y Cynulliad 2011-12 yn rhoi trosolwg strategol ar flaenoriaethau strategol Comisiwn y Cynulliad, ac yn rhoi pwyslais cryf ar adeiladu Cynulliad ar gyfer y dyfodol. 

Adroddiad Blynyddol ar gyfer y cyhoedd fydd hwn, ond bydd hefyd o ddiddordeb i Aelodau’r Cynulliad, eu staff cymorth, y cyfryngau a rhanddeiliaid eraill. Bydd yn ymdrin â nifer o themâu, gan gynnwys paratoi ar gyfer yr etholiad a’r diddymiad; yr etholiad a’r aelodaeth newydd; gwaith Comisiwn newydd y Cynulliad a’r trefniadau ar gyfer busnes y Cynulliad.

Cytunodd y Comisiwn ar gynnwys arfaethedig yr Adroddiad Blynyddol, Cytunwyd i gyhoeddi adroddiad gwahanol yn amlinellu’r hyn y mae’r Comisiwn wedi’i gyflawni yn ystod blwyddyn gyntaf y Pedwerydd Cynulliad; adroddiad ar gyfer Aelodau’r Cynulliad yn bennaf fydd hwn. 

Cam i’w gymryd: swyddogion i fwrw ymlaen â’r paratoadau angenrheidiol.

Trafododd y Comisiwn yr Adroddiad Blynyddol drafft ar gyfer 2010-11. Nodwyd y byddai proses ar wahân yn cael ei dilyn ar gyfer y cyfrifon yn yr un cyfnod. Pwyllgor Archwilio Comisiwn y Cynulliad fyddai’n craffu ar y cyfrifon - Angela Burns, fel y Comisiynydd â chyfrifoldeb dros y gyllideb a llywodraethu, oedd cynrychiolydd y Comisiwn. Byddai’r adroddiad blynyddol a’r cyfrifon wedyn yn cael eu cyhoeddi ar y cyd mewn un ddogfen ar 14 Gorffennaf.

Yn ogystal â chyfrifoldeb statudol y Comisiwn i baratoi a chyflwyno’r adroddiad blynyddol a’r cyfrifon, roedd y Comisiynwyr am sicrhau y byddai’r cyhoeddiad yn cyrraedd cynifer o bobl â phosibl a cyflawnwyd hyn drwy ddarparu fersiwn ar-lein ar ffurf llinell amser ryngweithiol a fyddai’n hollol hygyrch. Yn ogystal, byddai crynodeb hefyd yn cael ei baratoi ac ar gael i’r cyhoedd.

Roedd y naratif yn rhoi adolygiad o weithgarwch yn 2010-11 a byddai’n cael ei werthfawrogi gan y sawl sy’n edrych ar hanes y Cynulliad. Gwnaeth y Comisiynwyr sylwadau penodol, a fydd yn cael eu cynnwys mewn fersiwn ddiwygiedig. Yn ogystal, byddai Iwan Williams yn trafod gwelliannau penodol a awgrymwyd gan Sandie Mewies.

Gweithred: Iwan Williams i drafod y gwelliannau awgrymodd Sandy Mewies. Claire Clancy i ddiwygio’r naratif fel yr awgrymwyd yn y cyfarfod.